ჰოლივუდის ვარსკვლავს ახალი ჰობი აქვს - მან ქათმების მოშენება დაიწყო. რა გახდა მსოფლიოში ერთ-ერთი ყველაზე ცნობილი მსახიობის ამ გატაცების მიზეზი?.. თურმე ნუ იტყვით, ანჯელინას სურს, რომ მისმა მეუღლემ და მრავალრიცხოვანმა შვილებმა მხოლოდ ნატურალური პროდუქტები მიირთვან! ამჟამად ბრედ პიტი და 6 ბავშვი დილაობით მხოლოდ ახალდადებული კვერცხისგან მომზადებულ ერბოკვერცხს მიირთმევენ. ბრედი ენჯის ყველა წამოწყებას მხარს უჭერს, ამიტომ შინაური ფრინველის მოშენების იდეასაც სიხარულით შეხვდა.
მკითხველს ალბათ ახსოვს, რომ ჯოლი-პიტის ოჯახში 6 ბავშვი - 3 ნაშვილები და 3 ღვიძლი შვილი იზრდება. ამ ცოტა ხნის წინ ანჯელინა ეკვადორში, კოლუმბიელ ლტოლვილთა სოფელს ეწვია. მსახიობის საქველმოქმედო მოგზაურობის მიზანი - მსოფლიო საზოგადოების სამსჯავროზე იმ გაჭირვებისა და პრობლემების გამოტანაა, რომელსაც ქალები და ბავშვები აწყდებიან.
